Аймағамбетов Қазақстанда ҰБТ өткізу тәртібін қайта қарауды ұсынды

Қазақстанда Ұлттық бірыңғай тестілеуді жасанды интеллекттің дамуын ескере отырып, қайта қарау қажет. Бұл туралы Мәжіліс депутаты Асхат Аймағамбетов Мәжілісте өткен дөңгелек үстелде айтты.

Депутаттың сөзінше, заманауи технологиялар білім беру саласына айтарлықтай ықпал етіп отыр, сондықтан тестілеудің бұрынғы тәсілдері жеткіліксіз болуы мүмкін.

"ҰБТ қалай өзгереді? Сұрақтар қалай құрылады? Бұрынғыдай нәтижеге қарап бағалай алмаймыз. ChatGPT сынды құралдардың пайда болуымен ҰБТ-ның трансформациясы қалай жүзеге асады – бұл сұрақ әлі ашық күйінде тұр", – деді Аймағамбетов.

Сонымен қатар ол жоғары оқу орындарындағы жалпыға міндетті пәндер тізімін кеңейтуді ұсынып, философия мен қоғамдық-саяси пәндерге басымдық беру қажет екенін айтты.

"Data Science саласына ерекше назар аударуымыз керек. Деректермен жұмыс істеу міндетті дағдыға айналып келеді. Статистикамен жұмыс істеу де негізгі құзыреттіліктердің бірі болуы тиіс", – деді депутат.

Асхат Аймағамбетовтің ұсынысы талқылауға шығарылды.