Алматыда үздік білім ордаларының басын қосқан ауқымды форум өтті

Алматы қаласында «Жарқын болашаққа жол: қоғамды тазартатын 5 қадам» атты форум өтті. Бұл шараның аясында қоғамдағы маңызды мәселелер талқыланды. Форумды Шығыс аймақтық Білім-инновация қоры ұйымдастырып, ол Алматыдағы Ш.Беркімбаева атындағы Алматы қыздар мектеп-лицей интернатында өтті. Форум кезінде білім көрмесі ұйымдастырылып, спикерлер ата-аналар мен мектеп мұғалімдеріне лудомания, нашақорлық, вандализм, зорлық-зомбылық және ысырапшылдық тақырыптарында маңызды ақпарат ұсынды. Талқылаудың мақсаты — осы мәселелердің балалардың болашағына қандай қауіп төндіретінін түсіндіру және оларды алдын алу жолдарын қарастыру.

Форумға 200 адам қатысып, «Ақсай», «Өскемен», «Семей», «Талдықорған», «Есік» Білім Инновация Лицейлері, «Galaxy» мектебі, «Сүлеймен Демирел» лицейі, «Алқыз», «Нұрорда» мектептерінің үздік мұғалімдері қатысты. Форумның ашылу салтанатында Ш.Беркімбаева атындағы Алматы қыздар мектеп-лицей интернатының басшысы Тамер Гур сөз сөйлеп, оқу орнының тарихы мен жетістіктері жайлы баяндады.

Форумның алғашқы спикерлерінің бірі, Астана қаласындағы «Ырыскелді» мешітінің бас имамы Нұрлан Асанов, ұстаздардың рөліне және ысырапшылдық тақырыбына тоқталды. Ол мектеп мұғалімдерінің қоғамдағы маңыздылығын атап өтіп, оқушылардың білімге деген құштарлығын ояту жолдарын талқылады.

Психолог Мөлдір Тоқжанова вандализмнің себептерін түсіндіріп, ата-ана назарынан тыс қалған балалардың өздерін көрсетуге тырысатынын айтты. Ол бала тәрбиесінде ата-ананың үлгі болуының маңыздылығын атап өтті.

Форумда зорлық-зомбылық мәселесі де көтерілді. Педагог-психолог Мадина Сулиева бұл тақырыпта отбасы ішіндегі зорлық-зомбылықтың балаларға кері әсерін талқылады. Ол сондай-ақ, балалық шақта зорлық-зомбылыққа ұшырағандардың кейінгі өміріне қандай әсер ететінін айтты.

Нашақорлық туралы Жанайхан Мұстафа өз ойын білдіріп, есірткіге тәуелділікті тек физикалық ауру ретінде емес, сонымен қатар психологиялық мәселелермен байланысты қарау қажеттігін атап өтті. Ол нашақорлықтың себебіне назар аудару керектігін айтып, әрбір жағдайдың артында терең себептердің жатқанын түсіндірді.

Форум соңында қатысушылар мен спикерлер арасында сұрақ-жауап алмасу болды. Ата-аналар мен мұғалімдер бала тәрбиесі мен жағымсыз әдеттер туралы қосымша мәліметтер алды. Шара соңында Шығыс аймақтық Білім-инновация қорының координаторы Жошкун Шабан алғысөз айтып, барлық қатысушыларға ризашылығын білдірді.