Заңсыз декреттік төлем алған тұлғаларға амнистия қолданылмайды

Қазақстанда жалған жұмысқа орналасу арқылы әлеуметтік төлемдерді заңсыз иемдену фактілері бойынша тергеу жұмыстары жалғасуда. Еңбек және халықты әлеуметтік қорғау министрлігінің мәліметінше, аталған схемаларға қатысы бар тұлғалар мемлекетке келтірілген шығынды толық көлемде өтеуге міндетті.

Мәселеге қатысты түсініктеме берген Еңбек және халықты әлеуметтік қорғау вице-министрі Виктория Шегайдың айтуынша, министрлік еліміздің 13 өңірінде әлеуметтік төлемдерді алудың заңсыз схемаларын анықтады. Нәтижесінде 38 қылмыстық іс қозғалып, тергеу аясына 1000-нан астам азаматша тартылған. Қазіргі таңда 9 іс бойынша сот үкімі шықты. Жалпы шығын көлемі шамамен 3 миллиард теңгені құрайды.

Вице-министр заңсыз жолмен алынған қаражатты қайтару мәселесі бойынша амнистия қолдану қарастырылмағанын мәлімдеді.

«Мұндағы басты мәселе - декреттегі аналардың өздері емес, олардың сенімін теріс мақсатта пайдаланып, заңсыз схемаларға тартқан адамдардың әрекеті. Қазіргі таңда осы тұлғаларға қатысты қылмыстық істер жүргізілуде. Дегенмен заңсыз жолмен алынған төлемдерді мемлекетке қайтару - міндетті талап», - деп атап өтті Виктория Шегай.

Министрлік өкілі қолданыстағы заңнамада әлеуметтік төлемдерді заңсыз алған тұлғаларды қарыздан босатуға немесе оларға амнистия қолдануға құқықтық негіз жоқ екенін ескертеді.