Көктайғақ, боран, тұман: Еліміздің көп бөлігінде ауа райы нашарлайды

23 желтоқсанда Қазақстанның басым өңірінде қолайсыз ауа райы күтіледі. Қазгидромет қар, боран, тұман мен көктайғаққа байланысты тұрғындарға сақ болуды ұсынды.

Метеорологтардың мәліметінше, солтүстік-батыстан келген циклон батыс, солтүстік және оңтүстік-батыс аймақтарға қар мен жаңбыр әкеледі. Ал оңтүстік-шығыс пен шығыс өңірлерде антициклон әсерінен жауын-шашын болмайды. Көптеген облыста жел күшейіп, жолдарда көктайғақ пайда болады.

Астанада түнде және таңертең көктайғақ күтіледі, күндіз оңтүстік-батыстан соққан желдің жылдамдығы 20 м/с-қа дейін жетуі мүмкін. Ақмола облысында қар жауып, жаяу бұрқасын байқалады, кей жерлерде жел 25 м/с-қа дейін күшейеді. Көкшетауда желдің екпіні 15–20 м/с болады.

Жетісу облысының таулы аудандарында тұман мен көктайғақ күтіледі, Алакөл маңында жел 23–28 м/с-қа дейін үдейді. Түркістан облысында, сондай-ақ Шымкент пен Түркістан қалаларында тұман түседі. Маңғыстау облысының орталығында көктайғақ, ал басқа бөліктерінде тұман болады. Ақтауда да қою тұман күтіледі.

Қызылорда облысының солтүстігінде көктайғақ, орталық және оңтүстік аймақтарында тұман болжануда. Жамбыл облысында, оның ішінде Таразда, тұман мен көктайғақ болады, таулы жерлерде желдің екпіні 20 м/с-қа дейін жетеді.

Ақтөбе облысының батысы мен солтүстігінде тұман және көктайғақ байқалады. Ұлытау облысында қар жауып, жаяу бұрқасын мен тұман сақталады. Батыс Қазақстан облысында қар мен жаңбыр аралас жауын-шашын, боран және желдің күшеюі күтіледі.

Алматы облысының оңтүстігінде, Алматы мен Қонаевта тұман мен көктайғақ болады. Павлодар облысында қар жауып, жаяу бұрқасын соғады. Шығыс Қазақстан және Абай облыстарында да боран, тұман және қатты жел болжанып отыр. Солтүстік Қазақстан мен Қостанай облыстарында желдің екпіні 25 м/с-қа дейін жетуі мүмкін. Қарағанды облысында қар жауып, тұман түседі.

Мамандар жүргізушілерге жолда мұқият болуды, ал тұрғындарға алыс сапарларды кейінге қалдырып, ауа райы жағдайын ескеруді ұсынады.