Қазақстанның қай өңірінде +40 градусқа дейін ысиды? Синоптиктердің жаңа болжамы

«Қазгидромет» РМК мамандарының мәліметінше, 2026 жылдың 16-18 маусым аралығында Қазақстан аумағында фронталды бөліктердің өтуіне байланысты ауа райының тұрақсыздығы байқалады. Елдің басым бөлігінде жаңбыр жауып, найзағай ойнайды, бұршақ түсуі және желдің күшеюі ықтимал.

Алдағы күндері еліміздің батыс және солтүстік өңірлерінде нөсер жаңбыр жауады деп күтілуде. Атап айтқанда, 18 маусым күні Солтүстік Қазақстан және Ақмола облыстарында жауын-шашын қарқынды болады деп болжанып отыр.

Республиканың оңтүстік-батысы мен оңтүстік аймақтарында ауа температурасының +35...+40 градусқа дейін көтерілуіне байланысты қатты ыстық сақталады. Сондай-ақ, елдің солтүстік, шығыс және орталық бөліктерінде сынап бағанасы +35...+38 градусқа дейін жетеді. Респуликаның өзге аумақтарында ауа температурасының айтарлықтай өзгерісі күтілмейді.

Ағымдағы жылдың 12 маусымында америкалық метеорологтар жер шарындағы температураның жоғарылауына әсер ететін «Эль-Ниньо» құбылысының басталғанын хабарлады. «Қазгидромет» сарапшыларының түсіндіруінше, Қазақстан аталған феноменнің тікелей әсер ету аймағына жатпайды. Дегенмен атмосфералық циркуляцияның өзгеруі нәтижесінде бұл құбылыс республикадағы ауа райына жанама әсер етуі мүмкін.

Азаматтарға ауа райы ескертулерін бақылауда ұстау және ыстық күндері қауіпсіздік ережелерін сақтау ұсынылады.