$ 493.85 € 571.78 ₽ 6.25

Ираннан Қазақстанға қышқыл жаңбыр келе ме?

Абдрахманов Мағжан
10 наурыз 2026, 09:33
Ираннан Қазақстанға қышқыл жаңбыр келе ме? Сурет авторы: ашық дереккөзден

Әлеуметтік желілерде тараған Иран аумағынан Қазақстан мен Орталық Азияға қышқыл жаңбыр келеді деген ақпарат шындыққа сәйкес келмейді. Бұл туралы «Қазгидромет» мәлімдеді.

Метеорологтардың түсіндіруінше, қышқыл жаңбыр әдетте өндіріс орындары, энергетика нысандары немесе көлік шығаратын күкірт оксиді мен азот қосылыстары атмосфераға тарағанда пайда болады. Мұндай құбылыс көбіне ластану көзіне жақын аймақтарда байқалады.

– Ауа массалары алыс қашықтыққа тараған кезде күкірт оксиді мен азоттың концентрациясы табиғи атмосфералық процестердің әсерінен азаяды. Қазіргі мониторинг нәтижесіне сәйкес, Қазақстан мен Орталық Азия аумағына зиянды заттардың тарағаны тіркелген жоқ, – деп хабарлады «Қазгидромет» 9 наурызда.

Айта кетейік, демалыс күндері Израиль Ирандағы мұнай базаларына соққы жасап, Тегеранда ірі өрт шыққан. Оқиғадан кейін қала аспанын қою түтін басқаны хабарланған.

Иранның Қызыл жарты ай қоғамы мұнай қоймаларындағы жарылыстан кейін атмосфераға улы көмірсутектер, күкірт оксиді мен азот көп мөлшерде бөлінгенін мәлімдеген. Осыған байланысты кей сарапшы қышқыл жаңбыр жаууы мүмкін деген қауіп айтқан еді.

#Мұнай #Қышқыл жаңбыр #Қазгидромет

Соңғы жаңалықтар