Еліміздің кейбір өңіріне аптап ыстық қайта оралады

23–25 шілде аралығында Қазақстанның батыс өңірлерінде аптап ыстық қайта күшейеді. Кейбір ауданда күндізгі ауа температурасы 40–44 градусқа дейін көтерілуі мүмкін, деп хабарлады «Қазгидромет».

Синоптиктердің мәліметінше, алдағы үш тәулікте елдің батысына Иран аумағынан жылы әрі құрғақ ауа ағындары келеді. Соның әсерінен жауын-шашын тоқтап, ауа температурасы біртіндеп жоғарылайды. Күндіз батыс облыстарда 34–39 градус, жекелеген аудандарда 40–44 градус ыстық болады.

Ал Қазақстанның өзге бөлігінде ауа райы құбылмалы болады. Солтүстік-батыстан келген циклонның ықпалымен жаңбыр жауып, найзағай ойнайды. Кейбір өңірде нөсер жауын күтіледі.

Ел аумағының басым бөлігінде бұршақ жаууы ықтимал. Суық ауа массаларымен толыққан циклон бірқатар өңірде ауа температурасының төмендеуіне де әсер етеді.

Осылайша, алдағы күндері Қазақстанда ауа райы өңірлерге қарай айтарлықтай ерекшеленеді: батыста құрғақ әрі аптап ыстық болса, елдің көп бөлігінде жаңбыр, найзағай, бұршақ және салқындау күтіледі.