«Ақшаны алды, баланы оқытпады»: Tesla Education төңірегіндегі дауға депутат пікір білдірді

Астанадағы Tesla Education оқу орталығының жабылуына және ата-аналар ақшасын қайтара алмай жатқанына байланысты Мәжіліс депутаты Олжас Құспеков өз пікірін білдірді, деп хабарлады Qrnews.

Депутаттың айтуынша, бұл жағдай ата-аналар мен оқушылардың құқықтарын қорғау мәселесін қайта көтеріп, жеке білім беру саласында мемлекеттік реттеу мен қаржылық бақылаудың қажеттілігін көрсетті.

«Tesla оқу орталығы осы күнге дейін жұмыс істеп келді ғой. Биыл өздерінің ішкі қаржылық сауатсыздығына немесе өзге себептерге байланысты халық алдындағы жауапкершілігін орындай алмай отыр. Ақшаны да қайтармай жатыр. Ең алдымен, сол жерден зардап шеккен ата-аналар мен оқушыларды оқуға орналастыру қажет. Екіншіден, мұндай жағдайдың қайталанбауы үшін мемлекеттік реттеу ережелерін енгізу керек», – деді Олжас Құспеков.

Ол сондай-ақ, ата-аналар Kaspi арқылы алдын ала төлеген ақшаның қайтарылмауы – қаржылық теңгерімнің бұзылғанының белгісі екенін атап өтті.

«Көп ата-аналар бір жылдық оқу ақысын алдын ала төлеген, бірақ оқу орталығы қызметін тоқтатты. Сондықтан қаржылық тұрақтылықты бақылау тетіктерін күшейту қажет», – деді депутат.

Оның пікірінше, жеке білім беру нарығы өз ішінде де өзін-өзі реттейтін ұйым құруы тиіс, яғни сапасын дәлелдеген және адал жұмыс істейтін оқу орталықтары бірігіп, нарықтағы жауапкершілікті күшейтуге атсалысуы керек.

Еске салайық, Астанада орналасқан Tesla Education оқу орталығы екі айдан бері ата-аналарға оқу ақысын қайтармай отыр. Қыркүйек айында ақшасын қайтаруға өтініш берген көптеген ата-ана әлі күнге дейін қаражаттарын ала алмай жүр.