Ыстық күннің салдары ауыр: Алматыда жедел жәрдем шақыртулар саны рекордқа жетті

Алматыдағы қапырық күн райы шаһардың жедел медициналық көмек қызметіне айтарлықтай күш түсірді. Шілденің алғашқы екі аптасында алматылықтардан 33 мыңнан астам қоңырау түсіп, қалалықтардың денсаулығына қатысты мәселелер көбейген. Бұл ақпарат жайлы Курсив хабарлады.

Медицина мамандарының сөзінше, ауа температурасының жоғарылауы әсіресе созылмалы сырқаты бар адамдарға қауіп төндіріп отыр. Екі аптаның ішінде 1,5 мың адам қан қысымының секіруіне байланысты көмек сұраса, жүрек-қан тамырлары аурулары, соның ішінде инфарктпен ауырғандардың саны 300-ден асқан. Сонымен қатар, инсульт алған 50-ге жуық науқас шұғыл түрде ауруханаға жатқызылды. Күн өту жағдайлары да екі есеге көбейіп, жағдайды қиындатып тұр.

Дәрігерлер тұрғындарға сағат 11:00-ден 17:00-ге дейін далада жүрмеуге кеңес береді. Табиғи матадан тігілген жеңіл киім киіп, бас киім тағу және суды көбірек ішу өте маңызды. Алкоголь мен кофеден, сондай-ақ тәтті сусындардан бас тартқан абзал. Егер адамның есінен тану, жүрек айну немесе бас айналу сияқты белгілер байқалса, дереу салқын жерге жатқызып, алғашқы көмек көрсетіп, жедел жәрдем шақыру керек.

Айта кету керек, биыл Қазақстанның басым бөлігінде ауа райы аномальды көрсеткіштерге жетіп отыр. Мәселен, маусым айында Астанада да ауа температурасы +36,8 градусқа дейін көтеріліп, тарихи шектен асты.