Синоптиктер ескертеді: Қазақстанның үш ірі қаласында қолайсыз ауа райы күтілуде

Төтенше жағдайлар министрлігі (ТЖМ) ағымдағы жылдың 18 маусымы, бейсенбі күніне арналған Астана, Алматы және Шымкент қалаларындағы ауа райы болжамын жариялады.

Үш ірі қалада синоптикалық жағдай төмендегідей сипатталады:

Астана: Күн райы құбылмалы болады, жаңбыр жаууы ықтимал. Желдің жылдамдығы секундына 7-12 метрді құраса, күндіз оның екпіні 15-18 метрге дейін күшейеді. Ауа температурасы түнде +17…+19°C, күндіз +32…+34°C деңгейінде сақталады.

Алматы: Аспанды бұлт торлап, найзағай ойнап, жаңбыр жауады. Желдің жылдамдығы секундына 3-8 метр, екпіні 13 метрге дейін жетуі мүмкін. Сынап бағаны түнде +19…+21°C, күндіз +30…+32°C көрсетеді.

Шымкент: Ауа райы бұлтты болады, өткінші жаңбыр жауып, найзағай соғады. Желдің екпіні секундына 8-13 метрден 15-20 метрге дейін күшейеді. Түнде ауа температурасы +19…+21°C, күндіз +33…+35°C ыстық болады.

«Қазгидромет» РМК мамандарының мәліметінше, ыстық және суық ауа массаларының соқтығысуы мен атмосфералық фронттардың тұрақсыздығынан ел аумағының басым бөлігінде алдағы үш тәулік бойы қолайсыз ауа райы сақталады.

Республиканың солтүстік, оңтүстік және оңтүстік-шығыс аймақтарында найзағай ойнап, өткінші жаңбыр жауады деп болжануда. Ал орталық өңірлерде нөсер жауын жауып, желдің күшеюі және бұршақ жауу қаупі бар екені ескертілді.