Мұғалімдерге жасанды интеллектіні қолдануды үйрететін тегін курс басталды

Қазақстандық педагогтердің цифрлық құзыреттілігін арттыру мақсатында жаңа оқу жылы қарсаңында жасанды интеллектті қолдану бойынша тегін оқыту курстары ұйымдастырылды. Бағдарламаны ҚР Оқу-ағарту министрлігіне қарасты «Өрлеу» біліктілікті арттыру ұлттық орталығы ЮНЕСКО-мен бірлесіп іске қосты.

Халықаралық тәжірибеге негізделген бұл бағдарлама қазақстандық білім беру жүйесіне бейімделіп жасалған. Курста мұғалімдер жасанды интеллект құралдарын тиімді әрі этикалық тұрғыдан дұрыс пайдалануды үйренеді. Оқыту барысында педагогтерге промпт жазу әдістері, сабақ жоспарлау тәсілдері, тестілер мен оқу материалдарын әзірлеу, иллюстрациялар жасау, оқу мазмұнын жетілдіру және оқушылардың қызығушылығын арттыру жолдары түсіндіріледі.

Бағдарламаның басты мақсаты – жасанды интеллектіні мұғалімнің орнын алмастыратын құрал емес, кәсіби қызметін жеңілдететін сенімді көмекші ретінде қолдану. Бұл мұғалімдерге шығармашылыққа көбірек уақыт бөлуге мүмкіндік береді.

«Өрлеу» орталығы ұйымдастырған курстарға педагогтер https://reg.orleu.edu.kz сайты арқылы тіркеліп, LMS платформасында тегін қатыса алады. Бір аптаның ішінде оқуға 100 мыңға жуық адам қатысып, олардың жартысына жуығы сертификат алған.