Қазақстанның оңтүстігінде 46 градусқа дейін ыстық күтіледі

16–18 шілде аралығында Қазақстанның басым бөлігінде ауа райына солтүстік-батыс циклоны әсер етеді. Соның салдарынан батыс, солтүстік, орталық және шығыс өңірлерде жаңбыр жауып, найзағай ойнайды, деп хабарлады «Қазгидромет».

Синоптиктердің болжамынша, 16–17 шілдеде кей жерде нөсер жаңбыр жауып, бұршақ түсуі, екпінді жел соғуы мүмкін.

Батыс өңірлерде аптап ыстық біртіндеп бәсеңдеп, күндіз ауа температурасы +22...+35 градус, солтүстікте +21...+36 градус болады. Ал орталық пен шығыста +41 градусқа дейін ыстық сақталады.

Ең жоғары температура елдің оңтүстігі, оңтүстік-шығысы және оңтүстік-батыстың кейбір ауданында күтіледі. Орта Азиядан келетін ыстық ауа массаларының әсерінен бұл өңірлерде күндіз +41...+46 градусқа дейін ыстық болады. Бұл көрсеткіш климаттық нормадан жоғары.

Тек оңтүстік-шығыстың таулы аудандарында қысқа мерзімді жаңбыр жауып, найзағай ойнауы ықтимал.