Демалыс күндері Қазақстанның басым бөлігінде жаңбыр жауады

15-17 тамызда Қазақстанның басым бөлігінде жаңбыр жауып, найзағай ойнайды, екпінді жел соғып, бұршақ түсуі мүмкін. Тек елдің батысы мен Қызылорда облысында жауын-шашын болмайды, деп хабарлады «Қазгидромет».

Елдің батысы, солтүстік-батысы, солтүстігі мен орталығында түнде және таңертең тұман түседі. 15 тамызда Қостанай облысында, 15-16 тамызда Солтүстік Қазақстан және Ақмола облыстарында, 16 тамызда Павлодар облысында қатты жаңбыр жауады.

Батыс өңірлерде күндіз ауа температурасы +25...+33 градусқа дейін көтеріледі. Ақтөбе облысында +20...+30 градус болады.

Қостанай және Солтүстік Қазақстан облыстарында күн салқындайды. Түнде ауа температурасы +7...+12, күндіз +15...+20 градусқа дейін төмендейді. Ақмола мен Павлодар облыстарында түнде +10...+15, күндіз +17...+25 градус болады.

Елдің орталығы мен шығысында да аптап ыстық бәсеңдейді. Бұл өңірлердің оңтүстігінде күндіз +23...+33 градус күтіледі.

Қазақстанның оңтүстігінде ауа температурасы +38...+44 градустан +30...+37 градусқа дейін төмендейді. Оңтүстік-шығыста да аптап қайтып, күндіз ауа температурасы +30...+36 градус шамасында болады.