БҚО-да киік ату басталды: Қанша киік аулануы мүмкін?

Батыс Қазақстан облысында киік санын реттеу жұмыстары басталды. Бұл туралы облыс әкімдігінің баспасөз қызметі хабарлады.

Ресми мәліметке сәйкес, ату жұмыстары 30 қарашаға дейін жалғасады. Жұмысқа 40-қа жуық маман тартылып, төрт арнайы бригада құрылған. Әр бригада үш техникамен қамтамасыз етілген.

2025 жылы жүргізілген әуе санағы бойынша, облыс аумағындағы киіктер саны 2,3 миллион басқа жеткен. Ғалымдардың биологиялық негіздемесіне сүйенсек, популяцияға зиян келтірмей, жалпы санының 20 пайызына дейін реттеуге рұқсат етіледі. Бұл шамамен 460 мың киік деген сөз.

Ауланған жануарлардың еті "Кублей" ЖШС, "Жеңіс" ЖК, "Батыс-Нық" ЖШС және "Хаиров" ЖК секілді ет өңдеу кәсіпорындарына жеткізіледі. Болашақта бұл процеске өзге де ет комбинаттары тартылуы мүмкін.

Еске сала кетейік, маусым айының соңында Қазақстанда киік саны 3,9 миллионға жеткені хабарланған. Осыған байланысты билік ғалымдардың қорытындысына, фермерлердің ұсынысына және әлемдік тәжірибеге сүйене отырып, популяцияны реттеу шешімін қабылдаған.